Gleðileg jól og allt það

Veit ekki alveg hvað er í gangi hjá mér en ég hef bara ekki haft eirð í mér til að blogga neitt undanfarna daga. Byrjaði tvisvar en svo var eitthvað sem kallaði mig frá tölvunni. Girnilegt konfekt, íslenskt nammi, nýjar bækur, skemmtilegar bíómyndir. Hmmm bara búið að vera geðveikt mikið að gera hjá mér að gera nákvæmlega ekki neitt. Og það sem meira er, ég er að verða ógislega góð í því!! Það verður erfitt að takast á við grámyglaðan hversdagsleikann aftur þar sem ég sit hérna heima og geri ekki neitt. En þá verður ekkert nammi :/ Annars er ég að vera dugleg að semja atvinnuumsóknir og finna öll störf sem ég get sótt um. Reyni að vera bjartsýn á að þetta gangi upp núna fljótlega. Líkur eru á því að ég verði þá að ferðast til Osló í vinnu en það verður þá bara að vera þannig. Jólin hafa liðið ósköp hægt og hljótt hjá okkur fyrir utan hvað jólatréinu hefur gengið illa að standa kjurru. Rán hefur nefnilega séð til þess að tréið hristist og skelfur við mörg tækifæri á dag. Sérstaklega finnst henni gaman að leika við tréið þegar við Styrmir erum að fara að sofa. Svo maður neyðist eiginlega til þess að standa upp, akkúrat þegar sængin er orðin hlý og sussa á hana eða úða hana létt með vatnsbrúsanum sem var nú annars rykfallinn inni í skáp eftir margra mánaða fjarveru. En jólatréið hefur sloppið án sjáanlegra skemmda hingað til, reyndar er jólaserían orðin hrikalega sigin eitthvað. Við höfum greinilega séð þetta allt fyrir þegar við keyptum jólaskrautið þarna um árið, langflestar kúlurnar eru barn/kattheldar og við settum þessar brothættu bara ofarlega svo við þyrftum ekkert að grenja yfir því. Þetta er búið að vera yndislegt að vera heima í rólegheitunum en mikið sakna ég þess nú að hitta ekki vini og fjölskylduna. Verð sko þokkalega að reyna að bæta það upp á næsta ári! Heimþrá 2003, verð að fara að leggja fyrir fyrir flugmiðunum að ári ;) Áramótin nálgast og ég er farin að velta fyrir mér áramótaheitinu. Er að reyna að finna mér eitthvað raunhæft en samt ögrandi heit í ár. Skólafélagi hans Styrmis er búinn að bjóða okkur í mat á gamlárskvöld og svo verður partý á eftir. Ætti að verða stemming. Ég var himinlifandi þegar við fengum boðið. Var farin að sjá fyrir mér að ég yrði farin að sofa fyrir miðnætti á gamlárs :o Knús og kossar, sakna ykkar geðveikt!

Did you know...

While both male and female reindeer grow antlers in the summer each year, according to the Alaska Department of Fish and Game, male reindeer drop their antlers at the beginning of winter, usually late November to mid December. Female reindeer retain their antlers until after they give birth in the spring. Therefore, according to every historical rendition depicting Santa's reindeer, every single one of them, from Rudolph to Blitzen - had to be a girl. We should've known. Only women would be able to drag a fat-but man in a Red velvet suit all around the world in one night and not get lost.

Húmor

Þessir gaurar hafa húmor fyrir sjálfum sér!

Hafnarfjarðarbrandarar uppspuni frá rótum

Fjórði í aðventu

rólegheit einkenna þessa dagana. Við Styrmir erum búin að finna út hvað við ætlum að hafa í jólamatinn og erum meira að segja búin að kaupa jólasteikina sjálfa. Fengum okkur danska svínasteik með puru. Kjötið er samt merkt að það sé tryggt að það sé norskt gæðakjöt. Get þá kallað þetta norska danska svínasteik. Lítur allavega vel út og ég hlakka til að borða allan þennan góða mat :þ namm namm!! Við erum búin að fá pakka að heiman frá ættingjunum og allir skápar eru fullir af íslensku góðgæti. Verst að maður veit ekki hvar maður á að byrja, tímir varla að borða neitt hehe. Það verða nú örugglega engin vandkvæði á þessu hjá okkur. Þetta endar allt í maganum mínum og Styrmis að endingu. Við fengum hangikjöt, grænar baunir, jólaöl, flatkökur, rúgbrauð, lifrarpylsu, sviðasultu, harðfisk og fullt af nammi, lakkrís og súkkulaði. Og já, laufabrauð. Ég er örugglega að gleyma einhverju ;) Þúsund þakkir til mömmu & Óskars, ömmu & afa, Friðbjargar & fjölskyldu, Önnu & Mörtu og síðast en ekki síst Ásu & Jóa, pabba og Salvarar. Þorri bróðir hans Styrmis er í heimsókn hjá okkur, við ætlum í bíó í kvöld að sjá þriðja hluta af Hringadróttinssögu, "Atter en konge" á norsku, "Hilmir snýr heim" á íslensku (what the #$%#$%) og á ensku "The return of the king". Ég hlakka til að sjá myndina og er búin að vera að passa mig á því að sjá ekki trailerinn og upplýsingar um myndina í of miklu magni. Þoli ekki þegar manni finnst maður vera búinn að sjá myndina löngu áður en maður sér hana svo. Reyndar klikka ég á því núna eins og á síðasta ári að ég er ekki búin að sjá hina hlutana síðan ég sá þá í bíó. Hefði kannski verið sniðugt að rifja upp, hmmm. En það er allavega of seint núna. Ég get þá bara tekið syrpu seinna og horft á alla hlutana aftur. Á morgun ætlum við svo að kaupa síðustu jólapakkana og það sem okkur vantar í jólamatinn. Ég ætla að baka smákökur, næ því kannski á morgun. Svo vorum við að fá boð í laufabrauðsgerð á Þorláksmessu. Nóg af hlutum til að dunda sér við fram að jólum, en ekkert stress. Ótrúlega þægilegt :) Kongsberg er svo mikill smábær að maður tekur næstum ekki eftir því að "allir" séu í bænum. Ég er búin að vera að velta þessu fyrir mér undanfarið að ég er svo dugleg að dæma Noreg út frá Kongsberg. Sem er nú auðvitað bara vitleysa. Hvernig er hægt að dæma allt Ísland út frá Akureyri til dæmis? Skondið samt að spá í fólksfjöldann á Íslandi. Ég var að segja frá þessu um daginn þegar ég var spurð. "Jú, við erum rúm 280 þús." Ha? 280 þús. Er það allt?? "já já." Aðventukveðjur til allra, knús og kossar, Bryndís

Brrrrrr, kuldaskræfill

best að vera duglegur fyrst maður nennir því ;-) Sit hérna í tölvuherberginu dáldið loppin á höndunum pikkandi hérna á lyklaborðið. Það er óvenjulegt veður í Kongsberg í dag, rokið rífur í þakskeggið á húsinu og það hvín. Kuldalegt. En þetta er svosem ekkert meiriháttar óveður þannig séð :-) Ég er svekkt því ég þarf að fara út í banka, skrapp í morgun á pósthúsið, sem er líka bankinn minn. Ætlaði svo að borga reikning sem er á gjalddaga í dag í heimabankanum. En nei, í tilefni dagsins liggur heimabankinn niðri :-( Alveg glatað dæmi. Svo ég sit hérna og reyni að stappa í mig stálinu, þetta er þó ekki hávaðarok. Meira svona vindur eiginlega. En ég er bara samt ekkert að nenna að fara út... þarf að fara aftur út um sexleytið en þá verða haldin litlujólin í norskukúrsinum. Ég fer með harðfisk og flatkökur í smakk. Allir eiga að koma með mat frá heimalandinu sínu. Þetta verður vonandi þægileg og góð jólastund. Svo er Keikó bara dáinn, svona ungur, þetta er svo óréttlátt :( Hann var jarðaður í nótt, las ég í blaðinu. Það var svosem auðvitað og núna fá norðmennirnir allar tekjurnar af amríkönunum sem koma í flokkum til að skoða gröf Keikós. Við áttum hann fyrst!! og svo á eftir öllum dýragörðunum, þá áttum við hann líka!! Svo bara tekur hann smá vetrardvöl í noregi og þá eiga þeir hann, hrrmmmpppffff! En það er kannski eins gott að hann fékk að vera hér, amríkanarnir eru hvort sem ábyggilega hættir að koma í hvalaskoðun til Íslands eftir að við byrjuðum að skjóta þá okkur til gamans. Jæja, ég er orðin nógu heit til að hlaupa í gegnum veðrið niðrí banka, adieu, adjø, Bryndís

Þriðji í aðventu

Ég býst við að lesandinn minn sé orðinn verulega þreyttur á mér núna ;-) Ég hef enga sérstaklega góða afsökun, ég hef bara ekki skrifað neitt í heila viku núna. Margt búið að vera í gangi samt. Fór í norskupróf á þriðjudag og miðvikudag, það gekk bara mjög vel. Vona að ég fái hæstu einkunn fyrir það. Einkunnaskalinn er semsagt Vel staðið, staðið eða fallið. Ég er viss um að ég féll ekki. En ég veit ekki alveg hvernig þetta er dæmt svo ég get ekki ímyndað mér hvort ég fæ vel staðið eða bara staðið. Það skiptir svosem ekki svo miklu máli. Bara að þetta sé búið og ég þurfi ekki að vesenast við að taka þetta aftur. Nú svo er ég búin að vera að vinna. Fór í vinnuna eftir hádegi á miðvikudaginn þegar ég var búin í prófinu, vann svo fimmtudag og föstudag líka. Á föstudaginn var Lúsían haldin hátíðleg á leikskólanum og foreldrarnir komu í morgunkaffi. Það var bara kósý, fyrsta lúsían mín :D Svo fór ég eftir vinnu á föstudaginn og byrjaði að spá i jólagjafir. Er búin að kaupa og senda þær gjafir sem ég þarf að senda úr landi ;-) Kláraði þetta allt saman bara á laugardaginn, jibbíí. Það er góð tilfinning að vera búin að þessu og ég sit hérna svoleiðis með krossaðar tær og fingur að þetta komist allt til skila fyrir aðfangadag. Það hlýtur nú bara að vera. Trúi ekki uppá jólasveinana hjá póstinum að þeir fari að svíkja mig þó ég hafi skilað inn 2 dögum eftir löglega frestinn. Ég er að stressa mig alltof mikið yfir þessu! hehe Annars á ég eftir að vinna þrjá daga í næstu viku og er þá komin í jólafrí. Fínt að láta það heita það. Verst að eftir "jólafríið" mitt þarf ég að fara að leita að vinnu aftur. Samt alveg nauðsynlegt að láta þetta heita frí :D Það snjóaði á föstudaginn svo núna er allt eins og ég vil hafa það hérna í jólalandi. Hvítt yfir öllu og snjór í trjánum. Vona að það haldist fram yfir jól. Annars verður þetta svo voðalega drungalegt. Ég rölti við í verslunarmiðstöðinni áðan þegar ég skokkaði með pakkann á pósthúsið. Það var voða rólegt yfir öllu. Einstaka manneskja á ferli sem var greinilega að nýta sér rólegheitin til að versla nokkrar jólagjafir. Ég á bara eftir að kaupa fjórar jólagjafir og svo eitthvað handa okkur Styrmi. Við getum ekki ákveðið hvað okkur langar í :o Fínt að vera búin að mestu. Held ég hafi aldrei verið búin með svona mikið svona snemma. Nú á ég bara eftir að baka, jeiii. Og baða Rán, jeiii. Og þrífa... jeeeeiiiiiiiii. Og þá geta jólin komið! aðventukveðjur, kossar og knús, Bryndís

Annar í aðventu

nei hvað er að verða um þetta blogg mitt eiginlega, farin að blogga á vikufresti :-o Er búin að vera frekar upptekin og þreytt í vikunni, svo ég hef einfaldlega ekki fundið mig í því að setjast niður og skrifa... svosem ekkert sérstakt að skrifa um heldur. Hor og snýt hafa verið einkenni vikunnar, mjög sexý og skemmtilegt. En ég vona að ég fari þá að ná þessari pest úr mér að lokum. Er búin að vera slöpp og hress til skiptis í nokkrar vikur núna :( Var að vinna frá þriðjudegi til fimmtudags. Svo er ég búin að sitja við tölvuna að forrita. Ég er að klára þetta í bili og þarf núna að fara að undirbúa mig undir norskuprófið á þriðjudaginn og miðvikudaginn. Á þriðjudaginn verður les- og hlustunarskilningur. Það tekur 4 tíma. Svo á miðvikudaginn þá verður munnlegt, sem á að taka ca. 20 mín. Það fer þannig fram að við erum 2-4 saman í hóp og eigum að spyrja spurninga og svara þeim. Á skiljanlegri og sæmilega réttri norsku. Mér finnst leiðinlegt að þurfa að fara aftur á miðvikudeginum, þar sem prófið er haldið í Drammen. Það tekur 40 mín að keyra þangað með bíl. En ég þarf að taka rútu eða lest, er ekki búin að ákveða.. svo þetta verður öruggt aðeins lengri tími. Alveg glatað að þurfa að ferðast í 2 klst fyrir 20 mínútna samtal um veðrið. Og ekki nóg með það heldur átti ég að sjálfsögðu að vera að vinna bæði þriðjudaginn og miðvikudaginn. Fékk mér frí á þriðjudaginn en ætla að reyna að mæta eitthvað á miðvikudaginn. Eins gott að ég nái lestinni fljótt til baka ;) Annars er bara allt í fína hjá okkur, Styrmir er að læra undir próf, fer í fyrsta prófið á þriðjudaginn. Ég er næstum byrjuð að kaupa jólagjafir og get ekki beðið eftir að jólin flæði inn. hehe ;) Við erum voða mikið að spá í því hvað okkur langar að hafa í jólamatinn og það eru ýmsar uppástungur í pottinum. Allt frá nautalundum til lutefisks(hmmmm). Er voða mikið að hugsa heim þessa dagana, sé fyrir mér alla á hlaupum og þönum í Kringlum og Kleinum. En samt bara kósý að kaupa jólagjafir og heyra nokkur jólalög svona hér og þar. Geri þetta bara að vikulegum þætti hjá mér ;) knús og kossar til allra sem vilja og gleðilegan annan í aðventu :)