Við Styrmir fórum til Gautaborgar um helgina, ferðin varð frekar stutt í þetta skiptið vegna þess að ég þurfti að fara í atvinnuviðtalið sem ég talaði um í síðasta bloggi.
Það kom nú samt ekki í veg fyrir að við höfðum það ofsalega fínt hjá litlu fjölskyldunni á Lonsegärdsvägen.
Við brunuðum af stað klukkan fjögur á föstudaginn og stefndum á Ås þar sem finnst hið fínasta kattahótel. Við skutluðum Rán þangað, hún var ekkert sérstaklega ánægð en lét sig hafa það. Henni finnst ekkert gaman að hitta aðrar kisur, það er nokkuð ljóst. En hún hafði gott af helginni og knúsar okkur óspart síðan, finnst greinilega gott að vera heima :)
Svo héldum við áfram ferðinni til Gautaborgar, við vorum dágóða stund á leiðinni, tafir urðu vegna þess að ég kann ekki að lesa kort né vegamerkingar... alveg merkilegt hvað ég get misskilið hvert skal beygja eða hvenær :þ
Nú við náðum loksins til Gautaborgar, rétt eftir tíu um kvöldið og var tekið vel á móti okkur af fjölskyldunni. Nökkvi opnaði afmælisgjöfina sína og var alveg hæstánægður með hana. Nú svo var spjallað um allt milli himins og jarðar til að verða þrjú um nóttina en þá fórum við í háttinn.
Á laugardagsmorguninn vaknaði ég við ilminn af nýbökuðum rúnstykkjum og það tældi mig fram úr á nótæm. Settist út í sólina og borðaði nýbökuð rúnstykki og drakk kaffi. Síðan ákváðum við Lísa að það væri mjög góð hugmynd að kíkja aðeins á ströndina og fórum að taka okkur til.
Við kíktum á Fiskebäcks-ströndina sem er bara í nokkurra mínútna akstursfjarlægð frá þeim. Það var fínt að prufa aðeins á ströndina og ég synti meira að segja aðeins í sjónum... brr það var dáldið kalt, samt 20°c hiti á vatninu. En það var dáltill vindur sem skemmdi fyrir stemmingunni.
Svo ákváðum við að kíkja á Göteborgs Kalaset, sem er svona borgarhátíð í Gautaborg. Það er matur og vín og tónlist um allan miðbæinn. Það var mjög kósý og yndislegt að rölta um bæinn í sólinni og þurfa ekkert að gera. Við kíktum aðeins í Åhlens en þurftum ekkert að versla í þetta skiptið. Frábær búð samt, það fæst allt þarna, ég skoðaði heila hillu sem var full bara af salt- og piparkvörnum. Og svo allt hitt, allt til heimilisins, dömufatnaður, barnafatnaður, herrafatnaður, snyrtivörur, bækur, geisladiskar og fleira og fleira og fleira. Og þetta er bara ein búð í Fimmunni sem er stærsta mollið í Gautaborg. En við fórum ekki til að versla svo við gátum farið út með góðri samvisku án þess að kaupa nokkuð.
Um kvöldið grilluðum við yndislegt nautakjöt og kartöflur, maís, papriku og lauk. Í forrétt borðuðum við Höfðingja sem er ofsalega gott kjöt frá Íslandi. Þetta er semsagt hrátt hangikjöt, reykt sauðakjöt. Með þessu vorum við með piparrótarsósu, parmesan og melónu. Yndislegt...
Þetta kjöt var í boði hennar Friðbjargar frænku minnar sem sendi mér það með Bjarka þegar hann kom yfir um Versló. Takk fyrir okkur, þetta var yndislegt :)
Á sunnudeginum skelltum við okkur svo í Ikea og keyptum okkur hillur í stofuna, þetta eru rosa fínar svona Billy hillur, kosta næstum ekki neitt og líta alveg þokkalega út :) Fengum eina 2 metra háa hillu og svona hornhillu við það, svo keyptum við meters háa hillu líka. Síðan keyptum við sjónvarpshillu/skáp, þar sem við getum sett sjónvarpið upp á og vídeóið undir... græjurnar komast svo við hliðina á sjónvarpinu. Hugsað fyrir öllu í Ikea. Við fengum okkur svo náttborð í svefnherbergið. Þannig að við eigum nóg af hirslum núna, það verður aldeilis hægt að taka upp úr bókakössunum og raða núna. Verð að taka myndir fljótlega og setja í myndasafnið.
Well, þegar við vorum búin í Ikea fórum við heim á Lonsegärdsvägen og borðuðum yndislegt pastasalat með kjúklingi. Þá var kominn tími til að fara að tía sig af stað því við vorum búin að ákveða að versla okkur ódýran kjúkling í matinn og fleira. Svo við brunuðum í búðina og svo af stað út úr bænum um fjögurleytið. Við vorum komin að sækja Rán um hálfátta og hugsuðum okkur gott til glóðarinnar að vera komin heim eftir ca. 2 tíma, en nei... aldeilis ekki. Göngin undir oslofjörðinn voru lokuð og við máttum gjöra svo vel að keyra með ÖLLUM HINUM í gegnum miðbæinn í Osló... á gönguhraða nánast. Ekki gaman þegar maður á ekki von á því og er búinn að hugsa að maður sé NÆSTUM kominn heim :s Við vorum nú samt himinlifandi yfir því að Rán var "réttum" megin við fjörðinn og hún kom með okkur í Oslótraffíkina, annars hefðum við lent í vandræðum með að sækja hana (verið alltof seint á ferðinni).
En heim komumst við að lokum, sátt en nokkuð uppgefin eftir ferðina löngu ;)
Nú er bara að fara að plana næstu ferð í sæluna til Gautaborgar, spurning að rölta einn hring í Liseberg næst ef það verður ekki lokað, það væri gaman. Það er kominn nýr rússíbani (Baldur) sem sem við eigum eftir að prófa :D