Ekki satt? Ég var búin að lofa að setja inn ferðasöguna, ég er reyndar ekki búin með hana. Svona er þetta að vera bara með eina tölvu. En við ætlum að fara að splæsa í nýju móðurborði og fleira dóti svo bráðum eigum við tvær tölvur. Jeiiii!!!!
En hérna kemur ferðasagan, vona að þið séuð búin að koma ykkur þægilega fyrir með nesti, því þetta er langt. Og þetta er bara helmingurinn. Lái engum að nenna ekki að lesa í gegn. En þetta er nú líka mest fyrir mig ;)
Við byrjuðum ferðina hérna heima í Kongsberg 4. ágúst.
Tókum lestina fyrir hádegi frá Kongsberg til Gardermoen, vorum komin pínu tímanlega en það var bara fínt. Við versluðum eitthvað smálegt í fríhöfninni og settumst svo niður á veitingastað við hliðið okkar og fengum okkur að borða. Nú svo fór flugið á réttum tíma og við með.
Pabbi og Ása komu að sækja okkur í Keflavík. Ég hljóp í gegnum tollskoðunina og skildi Styrmir eftir með tollinn og hann lenti næstum í vandræðum. Talandi um að sakna fjölskyldunnar ;) En það bjargaðist allt saman. Hann dró mig inn aftur og við gátum vottað það að vera komin á aldur til þess að kaupa áfengi. (Meira sem maður er unglegur!!!)
Fyrsti dagurinn fór friðsamlega fram, við Ása fórum í Fjarðarkaup, sem ég hef saknað mikið, og keyptum alls kyns góðgæti. Svo fórum við heim og reyndum að elda hrygg. Það gekk ekki alveg þarna í fyrstu tveimur tilraununum en í þriðju var hann ljúffengur og svo góður að við steingleymdum að skilja eftir sneið handa pabba sem var á kvöldvakt. Pabbi fékk reyndar örlitla sneið af lundinni, sem er náttlega besti bitinn, svo ég held okkur hafi alveg verið fyrirgefið.
Á öðrum degi, fimmtudaginn 5. ágúst, fórum við Styrmir og pabbi í Bláa lónið. Það var yndislegt, hlýtt og gott en blés nokkuð hressilega. Mikið af allra þjóða kvikindum í lóninu eins og vant er og þó nokkuð af norðmönnum. Ætlunin var svo að keyra eitthvað um Reykjanesið eftir baðið en þegar að því var komið vorum við öll frekar uppgefin og ákváðum að fara frekar heim. Þar má kenna um of stórum skammti af afslöppun og gufubaði.
Um kvöldið fórum við í kaffi til Önnu og Mörtu. Sátum hjá þeim langt fram eftir kvöldi og var Marta eins og hetja ennþá að leika sér þegar við fórum. Anna sýndi okkur teikningar af nýju íbúðinni á Álftanesi sem þær ætla að flytja í fyrir jól.
Á föstudeginum 6. ágúst, fórum við í sund í Laugardalslaugina með Salvöru. Þetta var ansi fín sundferð, þó að við hefðum nú verið alveg til í að hafa Laugar Spa í sama pakka eins og við héldum. Pottarnir stóðu samt algjörlega fyrir sínu, sérstaklega nuddpotturinn. Gufan var heldur heit og við Styrmir héldumst aðeins inni í örfáar mínútur, held tvær. Eftir það fórum við smá rúnt til að tékka hvort miðbærinn liti ekki eins út og áður.
Seinnipartinn fórum við Styrmir svo í kaffi til Friðbjargar og sátum fram að kvöldmat. Mikið spjallað um allt og ekkert. Hittum Önnu og Mörtu aftur, þegar þær komu í heimsókn til Frænku. Anna kom í klippingu en Marta var þreytt eftir vöku yfir gestum kvöldið áður og steinsofnaði yfir Línu.
Um kvöldið grilluðum við svo lambakjöt á laufvanginum, hvað annað en lambakjöt á diskinn minn?
Enn seinna um kvöldið skellti ég mér í heimsókn til Bjargar í næstu blokk. Sátum og sötruðum sitthvorn bjórinn og spjölluðum þar til Hjörtur kom einhvern tímann í kringum miðnættið. Geta má þess að við Björg settum hægamet í bjórdrykkju en það tók okkur frá 9-12 að drekka sitthvorn stóra bjórinn. Getið bara ímyndað ykkur hvað við töluðum mikið ;)
Á laugardeginum 7. ágúst, fór ég á hárstofu Álftaness ásamt Ásu og við fengum klippingu og strípur ásamt því sem Anna fékk uppsett hárið í tilefni þess að hún var að fara í brúðkaup. Það var frekar gott að Friðbjörg hafði ekkert ætlað sér út úr húsi þann daginn því við tókum allan daginn frá henni í þetta hárstúss.
Um kvöldið fór ég svo að hitta vinkonur mínar úr HR og héldum við hátíðlega árshátíð matarklúbbsins á Skólabrú. Byrjuðum í kokteil hjá Ingunni á Bragagötunni og héldum svo á Skólabrú um átta leytið. Þar var tekið á móti okkur með kampavín í fordrykk og okkur boðið að setjast í koníaksstofuna á meðan allir voru að skila sér. Við vorum 8 saman: ég, Hrönn, Björk, María, Sirrý, Ingunn, Hrefna, Eygló. Okkur var svo vísað til borðs í hliðarsal á fyrstu hæðinni. Staðurinn er mjög huggulegur, allur málaður í ljósum lit með klassískum húsgögnum í alla staði. Í litla salnum sem við sátum í, voru tvær fallegar myndir málaðar af Þorra Hringssyni. Myndirnar voru af tveimur konum. Í stóra salnum, fengum við svo að sjá seinna um kvöldið, eru fleiri myndir eftir Þorra. Frumlegar myndir af mat, segi ekki meir :)
En að matnum, fyrst fengum við framreiddan lystauka sem var kjúklingaseyði með pínulitlum kartöflu og grænmetisbitum, borið fram í staupglasi. Í forrétt fengum við svo humar á sveppaflani með blaðlaukssósu. Ofsalega gott allt sem var á disknum, reyndar allt gott sem var á öllum diskunum. Svo fengum við millirétt sem var Þykkvalúra en það er fiskur sem ég hef aldrei smakkað áður en hann er barasta alveg yndislegur á bragðið. (Segir konan sem er ekki sérstaklega hrifin af fiski, það virðist reyndar vera að breytast, kannski er maður að verða fullorðinn??). Með forréttinum og milliréttinum var borið fram gott hvítvín sem ég er alveg búin að steingleyma hvað hét. Svo aðalrétturinn, það var nautalund með stökksteiktum sniglum. Rosalega gott líka, ég er að verða uppiskroppa með lýsingarorð. Með því fengum við rauðvín frá Maipo Vally, sem heitir Casilero Del Diablo. Bragðmikið vín frá Chile, alveg eins og mér finnst svo best. Þegar hér var komið sögu vorum við flestar orðnar sæmilega glaðar alveg. Allar voru í skýjunum með matinn og enn var eftirrétturinn eftir. Og það var punkturinn yfir i-ið. Það var frosið jógúrt & frosin hindber, súkkulaðifrauð/búðingur og möndlukaka.
Ég verð að segja að þetta kvöld á eftir að lifa í minningunni, ég skemmti mér mjög vel og var svo miklu meira en sátt með matinn og þjónustuna. Eftir matinn var okkur svo boðið upp í koníaksstofuna á ný og þar var sest og spjallað út í nóttina. Svo að lokum fannst okkur kominn tími á hreyfingu og þegar ég var búin að fá skoðunarferð um staðinn með Hrönn og Hendrik fórum við stelpurnar áleiðis á Thorvaldsen Bar. Tróðum okkur að sjálfsögðu í VIP röðina þar sem við áttum að eiga pláss. Það hafði víst verið aðeins fyrr um kvöldið en okkur tókst samt að komast inn fljótlega. Nú svo var dansað og ég hringdi í Styrmi og hann kom og hitti okkur. Við tvö fórum svo og hittum ”alla hina vinina” inni á Mojitos sem er nýji elítu-staðurinn fyrir ofan Apótekið. Fannst þetta nú hálfskrýtið með skemmtistað í þessum sal þar sem ég hafði síðast verið í fermingarveislu með ömmu og fleirum misgömlum frænkum. Við Styrmir og Júlía héldum svo á Glaumbar þar sem við hittum Ásu og Ösp og dönsuðum eitthvað með þeim. Júlía fór heim og við ákváðum að kíkja annað. Hittum annan Styrmi á leiðinni og ætluðum að draga hann með á Hverfisbarinn en þar var röð út september svo við ákváðum að það væri sniðugt að kíkja inn á Celtic Cross sem er hinum megin við götuna. Get ekki sagt að allar ákvarðanir sem eru teknar svo síðla kvölds/snemma morguns séu sniðugar! Djís hvað við vorum öll sammála að þetta var allt annað en snyrtilegur staður og ákváðum að fara heim. Fórum í leigubílaröð sem náði út að MR en komumst þó heil heim að lokum. Meira að segja hinn almennilegasti Skagastrákur sem keyrði okkur heim. Þetta var semsagt að kvöldi GayPride og ég var ekki hissa þegar hann sagðist hafa fengið margar hamingjuóskir í tilefni dagsins. Hann kannaðist samt ekkert við að vera þannig hýr.
Þúsund þakkir fyrir mig, Hrönn og Hendrik. Skólabrú hefur að mínu mati allt til þess að bera að verða góður veitingastaður og farsæll í ykkar eigu. Megi hamingjan fylgja ykkur og staðnum til framtíðar.
Á sunnudeginum, 8. ágúst, var ég frekar þreytt, ekki svo þunn, þó við hefði mátt búast eftir tvöþúsund og tvær sortir af víni og bjór. Við Styrmir fengum okkur bita á Fridays í Smáralind um kvöldið og fórum svo í bíó í Álfabakkanum. Til allrar hamingju mættum við snemma, þvílík röð!! Við sáum myndina The Village, hún var í lagi svosem en hefði getað verið betri. Skemmdi ótrúlega mikið fyrir okkur að við hliðina á mér sátu tvær stelpur sem sáu sér ekki fært að horfa á myndina án þess að reka upp þvílík öskur reglulega. Við sátum með hellur í eyrunum og misstum eiginlega alveg af því hvað var svona scary :
Mynd: 3 stjörnur af 5 mögulegum.
Sætisfélagar: hauskúpa.
Ég er náttlega ekkert búin með hálfa ferðasöguna, þetta eru bara fjórir dagar. Mér fannst ég bara búin að skrifa svo obboslega obboslega mikið. En jæja, restin er í vinnslu.
Kannski kemur meira á morgun, get ekki lofað því.